ಉಡುಪಿ ದುಖಿಸಾಯ್ಬಿಣಿಚಾ ಫಿರ್ಗಜೆಂತ್ ಅಗೋಸ್ತ್ ೧೫ ವೆರ್ ಮರಿಯೆಚೆಂ ಸರ್ಗಾ ವ್ಹರಣ್ ಆನಿ ಆಮ್ಚ್ಯಾ ರಾಷ್ಟ್ರಾಕ್ ಸ್ವತಂತ್ರ್ ಮೆಳ್ಲ್ಲೊ ದೀಸ್ ಲೀಜನ್ ಆಫ್ ಮೇರಿ ಹಾಚಾ ಸಾಂದ್ಯಾಂನಿ ಸಂಭ್ರಮಾನ್ ಆಚರಣ್ ಕೆಲೊ.
ಸಕಾಳಿಂ ೭;೧೫ ವರಾರ್ ಫಿರ್ಗಜ್ ವಿಗಾರ್ ಬಾಪ್ ವಲೇರಿಯನ್ ಮೆಂಡೋನ್ಸಾ, ಸಹಾಯಕ್ ವಿಗಾರ್ ಬಾಪ್ ವಿಜಯ್ ಡಿ’ಸೋಜಾ ಆನಿ ಬಾಪ್ ಲೋರೆನ್ಸ್ ಡಿ’ಸೋಜಾ ಹಾಣಿಂ ಸಂಭ್ರಮಿಕ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ. ಮಿಸಾ ವೆಳಾರ್ ಲಿಜನರಿಸ್ತಾನಿಂ ದೇವ್ ಸ್ತುತೆಂತ್ ಆನಿ ಕಾಣಿಕೆಚಾ ಪುರ್ಶಾಂವಾಂತ್ ವರ್ಚ್ಯಾ ಉರ್ಬೆನ್ ಭಾಗ್ ಘೆತ್ಲೊ. ಮಿಸಾ ಉಪ್ರಾಂತ್ ರಾಷ್ಟ್ರಾಕ್ ಮಾನ್ ಕರ್ನ್ ಸರ್ವ್ ಫಿರ್ಗಜ್ಗಾರಾಂ ಸವೆಂ ವಿಗಾರ್ ಬಾಪಾನಿಂ ರಾಷ್ಟ್ರಾಚೊ ಬಾವ್ಟೊ ಉಬೈಲೊ. ಸೈಂಟ್ ಮೇರಿಸ್ ಕನ್ನಡ ಮಾಧ್ಯಮ್ ಇಸ್ಕೊಲಾಚ್ಯೊ ಮುಖೆಲ್ ಮೆಸ್ತಿರ್ಣ್ಯೊ, ಶಿಕ್ಷಕಾಂ ಆನಿ ವಿದ್ಯಾರ್ಥಿ ಹಾಜರ್ ಆಸ್ಲ್ಲಿಂ.
ಹಾಜರ್ ಆಸ್ಲ್ಲ್ಯಾ ಸರ್ವಾಂಕ್ ಲಾಡು ವಿತರಣ್ ಕರ್ನ್ ತ್ಯಾ ದಿಸಾಚೊ ಸಂಭ್ರಮ್ ಅಕೇರ್ ಕೆಲೊ.