ವಾಡಾವಳೆಚ್ಯಾ ಹಂತಾರ್ ಭುರ್ಗ್ಯಾಂಕ್ ದೊಸ್ಚ್ಯಾ ಸಮಸ್ಯಾವಿಶಿಂ ಮಾಹೆತ್ ಶಿಬಿರ್
ಆಮ್ಚ್ಯಾ ಫಿರ್ಗಜೆಚ್ಯಾ ಸವಿ ಥಾವ್ನ್ ಧಾವ್ಯಾ ಕ್ಲಾಸಿ ಪರ್‍ಯಾಂತ್ಲ್ಯಾ ಭುರ್ಗ್ಯಾಂಕ್ ಭಲಾಯ್ಕೆ ಆಯೋಗಾಚ್ಯಾ ಮುಖೇಲ್ಪಣಾಖಾಲ್, ತಾಂಚ್ಯಾ ಭಲಾಯ್ಕೆ ಆನಿ ವಾಡಾವಳಿಚ್ಯಾ ಸಮಸ್ಯಾ ವಿಷ್ಯಾಂತ್ ಮಾಹೆತ್ ದಿಂವ್ಚೆ ಶಿಬಿರ್ ೨೦೧೫ ಆಗೊಸ್ತ್ ೨ ತಾರಿಕೆರ್ ಮಾಂಡುನ್ ಹಾಡ್‌ಲ್ಲೆಂ. ಸಂಪನ್ಮೂಳ್ ವ್ಯಕ್ತಿ ಜಾವ್ನ್ ಕೆ.ಎಮ್.ಸಿ. ಆಸ್ಪತ್ರ್ ಮಣಿಪಾಲ್ ಹಾಚಾ ಭುರ್ಗ್ಯಾಂಚಾ ವಿಭಾಗಾಚೆ ಪ್ರೊಫೆಸರ್ ಡಾ|ಲೆಸ್ಲಿ ಲುವಿಸ್, ತಶೆಂಚ್ ಕಸ್ತೂರ್ಬಾ ಆಸ್ಪತ್ರ್ ಮಣಿಪಾಲ್ ಹಾಚಿ ನಿವೃತ್ತ್ ನರ್ಸಿಂಗ್ ಸೂಪರಿಂಟೆಂಡೆಂಟ್ ಶ್ರೀಮತಿ ನತಾಲಿಯಾ ಪಿರೇರಾ ಹಾಜರ್ ಆಸ್‌ಲ್ಲಿಂ.
ಮಾಗ್ಣ್ಯಾದ್ವಾರಿಂ ಕಾರ್‍ಯೆಂ ಆರಂಭ್ ಜಾಲೆಂ. ಭಲಾಯ್ಕೆ ಆಯೋಗಾಚಿ ಸಂಚಾಲಕಿ ಶ್ರೀಮತಿ ವಿಲ್ಮಾ ಮಸ್ಕರೇನ್ಹಸಾನ್ ಸರ್ವಾಂಕ್ ಬರೊ ಯೆವ್ಕಾರ್ ಮಾಗ್ಲೊ. ಆಮ್ಚೆ ಫಿರ್ಗಜ್ ಯಾಜಕ್ ಬೊ|ಮಾ|ಬಾ|ಫ್ರೆಡ್ ಮಸ್ಕರೇನ್ಹಸ್ ಹಾಣಿಂ ಭುರ್ಗ್ಯಾಂನಿ ಆಪ್ಣಾಚೆಂ ವಾಡವಳಿ ಸಂಬಂಧಿ ಸಮಸ್ಯೆ ಕಶೆಂ ಪರಿಹಾರ್ ಕರ್ಚೆ ಆನಿ ವಾಡ್ಚ್ಯಾ ಭುರ್ಗ್ಯಾಂನಿ ಕಶೆಂ ಆಪ್ಣಾಚಿ ಭಲಾಯ್ಕಿ ಸಾಂಬಾಳ್ಚಿ, ವಾಡಾವಳೆ ವಿಶ್ಯಾಂತ್ ಸಮ್ಜಣಿ ಜೊಡ್ಚಿ ಆನಿ ಆಪ್ಣಾಚ್ಯಾ ಜಿವಿತಾಂತ್ ಪವಿತ್ರ್‌ಪಣ್ ಕಶೆಂ ಸಾಂಬಾಳ್ಚೆಂ ಮ್ಹಣ್ ಸಂದೇಶ್ ಪಾಟಯ್ಲೊ.ಸಹಾಯಕ್ ಫಿರ್ಗಜ್ ಯಾಜಕ್ ಬಾಪ್ ಮಾನಾಧಿಕ್ ರೊಯ್ಸನ್ ಫೆರ್ನಾಂಡಿಸ್, ಆಯೋಗಾಚೊ ಸಂಯೋಜಕ್ ಮಾನೆಸ್ತ್ ಆಲ್ಫೊನ್ಸ್ ಡಿ’ಕೋಸ್ತಾ, ವೇದಿಚೆರ್ ಹಾಜರ್ ಆಸ್‌ಲ್ಲೆ. ಹ್ಯಾ ಶಿಬಿರಾಕ್ ಆಯೋಗಾಚಾ ಸರ್ವ್ ಸಾಂದ್ಯಾಂನಿ ಸಹಕಾರ್ ದಿಲೊ. ಶ್ರೀ ಮೋಸೆಸ್ ನೊರೊನ್ಹಾನ್ ಉಪ್ಕಾರ್ ಆಟಯ್ಲೊ. ಶ್ರೀಮತಿ ಆಪೊಲಿನ್ ಪಿಂಟೊನ್ ಕಾರ್‍ಯೆಂ ಚಲವ್ನ್ ವೆಲೆಂ. ೯೫ ಭುರ್ಗ್ಯಾಂನಿ ಹ್ಯಾ ಶಿಬಿರಾಂತ್ ವಾಂಟೊ ಘೆತ್ಲೊ. ಶ್ರೀ ಉರ್ಬನ್ ಡಿ’ಮೆಲ್ಲೊ ಆನಿ ಶ್ರೀಮತಿ ರೇಷ್ಮ ಡಿ’ಸೋಜಾ ಹಾಣಿಂ ಸಂಪನ್ಮೂಳ್ ವ್ಯಕ್ತಿಂಚಿ ವಳಗ್ ಕರ್ನ್ ದಿಲಿ.
