ಯುವಜಣಾಂಚೊ ದೀಸ್

ಐ. ಸಿ. ವೈ. ಎಮ್ ಪಾತ್ರೊನ್ ಸಾಂ. ಗೊನ್ಜಾಲೊ ಗಾರ್ಸಿಯಾಚ್ಯಾ ಫೆಸ್ತಾ ಸಂದರ್ಭಿ ಫಿರ್ಗಜೆಚ್ಯಾ ಯುವಜಣಾಂ ಪಾಸತ್ “ಯುವಜಣಾಂಚೊ ದೀಸ್” ಮಾಂಡುನ್ ಹಾಡ್ಲೊ. ಕಾರ್ಯೆ‍ಂ ಮಾಗ್ಣ್ಯಾವಿಧಿ ಸವೆಂ ಆರಂಭ್ ಜಾಲೆಂ. ಸಂಘಟನಾಚೆಂ ಅಧ್ಯಕ್ಷ್ ವಿವೀನಾ ಸಲ್ಡಾನ್ಹಾನ್ ಜಮ್ಲಲ್ಯಾ ಸರ್ವಾಂಕ್ ಬರೊ  ಯೆವ್ಕಾರ್ ಮಾಗ್ಲೊ. ಮಾನಾಚ್ಯಾ ಸೈರ‍್ಯಾಂನಿ ತಶೆಂಚ್ ಯುವಜಣಾಂನಿ ಸಾಂ. ಗೊನ್ಜಾಲೊ ಗಾರ್ಸಿಯಾಚ್ಯಾ ತಸ್ವೀರೆಕ್ ಫುಲಾಂ ಝೆಲೊ ಆನಿ ಫುಲಾಂಚ್ಯೊ ಪಾಕ್ಳ್ಯೊ ಅರ್ಪುನ್ ಮಾನ್ ಭೆಟಯ್ಲೊ.  ಸಾಂತಾಚಿ ಜಿಣಿಯೆ ಚರಿತ್ರಾ ಸಾದರ್ ಕರುನ್ ತಾಚ್ಯಾ ಜಿಣಿಯೆ ಥಾವ್ನ್ ಪ್ರೇರಣ್ ಜೊಡುಂಕ್ ಅವ್ಕಾಸ್ ಕರುನ್ ದಿಲೊ. ಫಿರ್ಗಜ್ ಯಾಜಕ್ ಮಾ. ಬಾ. ಫ್ರೆಡ್ ಮಸ್ಕರೇನ್ಹಸ್ ಹಾಣಿಂ ಯುವಜಣಾಂನಿ ಆತ್ಮೀಕ್ ಸಂಗ್ತಿಂನಿ ಚಡಿತ್ ಆಸಕ್ತ್ ದಾಕವ್ನ್, ಫಿರ್ಗಜೆಚ್ಯಾ ಆತ್ಮೀಕ್ ಬರೆಪಣಾಕ್ ದೆಣ್ಗಿ ದೀಂವ್ಕ್ ಉಲೊ ದಿಲೊ. ಸಹಾಯಕ್ ಫಿರ್ಗಜ್ ಯಾಜಕ್ ಮಾ. ಬಾ. ರೊಯ್ಸನ್ ಫೆರ್ನಾಂಡಿಸ್ ಹಾಣಿ ದೆವಾಚ್ಯಾ ಉತ್ರಾಚೆರ್ ನಿಯಾಳ್ ದಿಲೊ ಆನಿ ಸಾಂತಾಚಿ ಜಿಣಿ ಜಾಣಾ ಜಾವ್ನ್ ತಾಚೆ ಥಾವ್ನ್ ಪ್ರೇರಣ್ ಜೊಡುನ್ ಜೆಜುಚ್ಯಾ ಮೊಗಾಂತ್ ವಾಡೊಂಕ್ ಯುವಜಣಾಂಕ್ ಉಲೊ ದಿಲೊ. ಯುವಜಣಾಂ ಖಾತಿರ್ ವಿವಿಧ್ ಸ್ಪರ್ಧೆ ಚಲಯ್ಲೆ ಆನಿ ಇನಾಮಾಂ ವಾಂಟ್ಲಿಂ. ಸಾಂಸ್ಕೃತಿಕ್ ಕಾರ‍್ಯೆಂ ಆನಿ ಜೆವ್ಣಾ ಸವೆಂ ಕಾರ್ಯೆ‍ಂ ಸಂಪ್ಲೆಂ.