ಫಿರ್ಗಜ್ ದಿವಸ್ ಆಚರಣ್ 07-02-2016

ದುಖಿ ಮಾಯೆಕ್ ಸಮರ್ಪಿಲ್ಲ್ಯಾ ಆಮ್ಚ್ಯಾ ಫಿರ್ಗಜೆಚ್ಯಾ ಸರ್ವ್ ದೇವ್‌ಪರ್ಜೆಚೊ ಎಕ್ವಟ್ ಪಾಚಾರ್ ಕರ್ಚೊ “ಫಿರ್ಗಜ್ ದೀಸ್-2016” ಸಂಭ್ರಮ್ ಫೆಬ್ರವರಿ 7 ತಾರಿಕೆರ್ ಚಲ್ಲೊ. ತ್ಯಾ ದಿಸಾ ಸಕಾಳಿಂ ಫಿರ್ಗಜೆಚ್ಯಾ ಲೊಕಾನ್ ಸಾಂಗಾತಾ ಮೆಳುನ್ ವ್ಹಡಾ ಉಮೆದಿನ್ ಆನಿ ಮೊಗಾನ್, ಸಾಂಜೆಚ್ಯಾ ಸಂಭ್ರಮಿಕ್ ಜೆವ್ಣಾ ಖಾತಿರ್ ತಯಾರಾಯ್ ಚಲಯ್ಲಿ. ಫಿರ್ಗಜ್ ಯಾಜಕ್ ಮಾ.ಬಾ. ಫ್ರೆಡ್ ಮಸ್ಕರೇನ್ಹಸ್ ಹಾಣಿಂ ಉಜೊ ಬೆಂಜಾರ್ ಕರುನ್ ಕಾರ್ಯಕ್ರಮಕ್ ಚಾಲನ್ ದಿಲೆಂ. ಸಾಂಜೆರ್ 5.30 ವೊರಾರ್ ಚಲ್‌ಲ್ಲ್ಯಾ ಸಂಭ್ರಮಿಕ್ ಅರ್ಗಾಂ ಬಲಿದಾನಾಕ್ ದಿಯೆಸೆಜಿಚೆ ಗೊವ್ಳಿ ಬಾಪ್ ಅತಿ ಮಾನಾಧಿಕ್ ದೊತೊರ್ ಜೆರಾಲ್ಡ್ ಲೋಬೊ ಪ್ರಧಾನ್ ಯಾಜಕ್ ಜಾವ್ನ್ ಹಾಜರ್ ಆಸ್‌ಲ್ಲೆ. ಮಾ. ಬಾ. ಲೋರೆನ್ಸ್ ಡಿಸೋಜ ಹಾಣಿಂ “ಎಕ್ವಟಿತ್ ಆನಿ ದಯಾಳ್ ಫಿರ್ಗಜ್ ಕುಟಮ್” ಮ್ಹಳ್ಳ್ಯಾ ಸಂದೇಶಾಚೆರ್ ಶಿಕವ್ಣ್ ದಿಲಿ. ಆಪ್ಣಾಕ್ ದೆವಾಕ್ ಸಮರ್ಪಿತಾಂವ್ ಮ್ಹಳ್ಳ್ಯಾ ಭೊಗ್ಣಾಂ ಸವೆಂ ಫಿರ್ಗಜೆಚ್ಯಾ ಲೊಕಾನ್ ದೆವಾಕ್ ಕಾಣಿಕ್ ಅರ್ಪಣ್ ಕೆಲಿ. ಉಪ್ರಾಂತ್ ಚಲ್‌ಲ್ಲ್ಯಾ ವೆದಿ ಕಾರ‍್ಯಾ ವೆಳಿಂ ಫಿರ್ಗಜೆಚ್ಯಾ ಉದರ್ಗತೆ ಪಾಸತ್ ನಿಸ್ವಾರ್ಥಿ ಸೆವಾ ದಿಲ್ಲ್ಯಾ ನಿರ್ಗಮಿತ್ ಗುರ್ಕಾರಾಂಕ್ ತಶೆಂಚ್ ನವ್ಯಾನ್ ವಿಂಚುನ್ ಆಯ್‌ಲ್ಲ್ಯಾ  ಗುರ್ಕಾರಾಂಕ್ ಕಾರ್ಯಾಚೆ ಅಧ್ಯಕ್ಷ್ ಗೊವ್ಳಿಬಾಪಾಂನಿ ಮಾನ್ ಕೆಲೊ. ಫಿರ್ಗಜೆಚೆಂ ಗೊವ್ಳಿಕ್ ಯೋಜನ್-2016 ಆಟಾಪ್ಚೊ ಬೂಕ್ ವಿಗಾರ್ ಜೆರಾಲ್ ಮೊನ್ಸಿ. ಬ್ಯಾಪ್ಟಿಸ್ಟ್ ಮಿನೇಜಸ್ ಹಾಣಿಂ ಮೊಕ್ಳಿಕ್ ಕೆಲೊ. ಫಿರ್ಗಜ್ ಗೊವ್ಳಿಕ್ ಮಂಡಳೆಚೊ ಕಾರ್ಯದರ್ಶಿ ಮಾನೆಸ್ತ್ ಗ್ರೇಶನ್ ಬುತೆಲ್ಲೊ ಹಾಣಿಂ ಫಿರ್ಗಜೆಚಿ ವಾರ್ಷಿಕ್ ವರ್ದಿ ಸಭೆ ಹುಜಿರ್ ದವರ್ಲಿ. ಫಿರ್ಗಜ್ ದಿಸಾ ಸಂದರ್ಭಿ ಮಾಂಡುನ್ ಹಾಡ್‌ಲ್ಲ್ಯಾ ವಿವಿಧ್ ಖೆಳಾ ಸ್ಪರ್ಧ್ಯಾಂನಿ ಜಿಕ್‌ಲ್ಲ್ಯಾ ವಿಜೇತಾಂಕ್, ವಿವಿಧ್ ಸ್ಪರ್ಧ್ಯಾಂನಿ ಇನಾಮಾಂ ಆಪ್ಣಾಯ್‌ಲ್ಲ್ಯಾ ಫಿರ್ಗಜೆಚ್ಯಾ ತಾಲೆಂತ್‌ವಂತ್ ಭುರ್ಗ್ಯಾಂಕ್ ತಶೆಂಚ್ ರಾಷ್ಟ್ರ್‌ಮಟ್ಟಾರ್ ಚಲ್‌ಲ್ಲ್ಯಾ ಸ್ಪರ್ಧ್ಯಾಂನಿ ಇನಾಮಾಂ ಆಪ್ಣಾಯ್‌ಲ್ಲ್ಯಾ ಫಿರ್ಗಜೆಚೊ ಸಂಸ್ಥೊ ಸಾಂ ಮೇರಿ ಆಂಗ್ಲ್ ಮಾಧ್ಯಮ್ ಇಸ್ಕೊಲಾಚ್ಯಾ ಭುರ್ಗ್ಯಾಂಕ್ ಗೊವ್ಳಿ ಬಾಪಾಂನಿ ಇನಾಮಾಂ ವಾಂಟ್ಲಿಂ. ಆಪ್ಣಾಚ್ಯಾ ಸಂದೇಶಾಂತ್ ಗೊವ್ಳಿಬಾಪಾಂನಿ ಫಿರ್ಗಜ್ ಕುಟ್ಮಾಕ್ ಬರೆಂ ಮಾಗ್ಲೆಂ. ಫಿರ್ಗಜೆಚ್ಯಾ ಭುರ್ಗ್ಯಾಂನಿ ತಶೆಂಚ್ ವೈ. ಸಿ. ಎಸ್ ಸಾಂದ್ಯಾಂನಿ ಸಾಂಸ್ಕೃತಿಕ್ ಕಾರ‍್ಯಿಂ ಸಾದರ್ ಕೆಲಿಂ. ಸಹಾಯಕ್ ಫಿರ್ಗಜ್ ಯಾಜಕ್ ಮಾ. ಬಾ. ರೊಯ್ಸನ್ ಫೆರ್ನಾಂಡಿಸ್ ಹಾಣಿಂ ಜೆವ್ಣಾಚೆರ್ ದೆವಾಚೊ ಆಶೀರ್ವಾದ್ ಮಾಗ್ಲೊ.  ಸಂಭ್ರಮಿಕ್ ಜೆವಾಣ್ ಆನಿ ನಾಚಾ ಸವೆಂ ಕಾರ್ಯಾಚೊ ದಬಾಜೊ ಸಂಪ್ಲೊ. ಕಾರ್ಯೆ‍ಂಯಾಕ್ 1200 ಫಿರ್ಗಜ್‌ಗಾರಾಂ ಹಾಜರ್ ಆಸ್‌ಲ್ಲಿಂ.